Minis Defans dominiken an, Carlos Antonio Fernández Onofre, anonse plis pase 11 000 sòlda ap siveye fwontyè ant Repiblik Dominikèn ak Ayiti. Deklarasyon sa a fèt nan yon kontèks kote otorite dominiken yo kontinye ranfòse dispozitif sekirite yo akoz enstabilite ak aktivite gwoup ame nan peyi Ayiti. Daprè minis la, militè yo deplwaye sou premye ak dezyèm liy defans fwontyè a. Lame dominikèn nan itilize tou dròn ak lòt teknoloji siveyans pou kontwole mouvman nan zòn fwontyè a.
Fernández Onofre fè konnen otorite militè yo rete vijilan epi yo pran dispozisyon pou reponn ak nenpòt sitiyasyon ki ta reprezante yon menas pou sekirite teritwa dominiken an.
