Nan yon konferans pou laprès jounen lendi 11 janvye 2021 an, plizyè manm nan opozisyon an anonse, mobilizasyon jeneral nan tout peyi a pou Jovenel Moïse bay talon l sou pouvwa a ap komanse apati vandredi 15 janvye k ap vini la.
Mèt André Michel, ki se pòt pawòl sektè demokratik la fè konnen Jovenel Moïse rete 26 jou sou pouvwa, daprè atik 134-2 konstitisyon amande 1987 la ak atik 239 dekrè électorale 2 mas 2015 lan.
Mèt la te pwofite okazyon an pou bay kèk dat kote peyi a pral leve kanpe pou manifeste kont prezidan Jovenel Moïse. 15 janvye ap gen manifestasyon nan Pòtoprens. Nan peyi Etazini nan plizyè vil ap gen manifestasyon pou mande nouvo administrasyon k ap monte a pa sipòte rejim sa ki sou pouvwa a.
20 janvye jounen mobilizasyon nasyonal pou mande prezidan Jovenel Moïse respekte konstitisyon an, pou l kite pouvwa a 7 fevrye 2021.
Apati 22 janvye 2021 ap gen mobilizasyon manch long nan tout peyi a an jeneral jiskake Jovenel Moïse kite pouvwa a 7 fevrye 2021, daprè Mèt André Michel.
Jeff Jean Joseph