Nan yon konferans pou laprès, maten lendi 25 janvye a, sekretè jeneral Pitit Desalin nan, Jean-Charles Moïse fè konnen li dakò pou genyen yon tranzisyon 2 zan, epi pou se yon jij kou kasasyon ki vin prezidan peyi a aprè depa Jovenel Moïse.
Ansyen senatè Nò a te rankontre sektè demokratik ak popilè a, Ayiti an Aksyon (AAA), ak anpil lòt gwoup nan opozisyon an. Lidè a pwofite di li fè anpil meyakoulpa.
Jean-Charles Moïse dakò pou gen yon premye minis nan tranzisyon an. Dirijan Pitit Desalin nan, dakò pou gen 13 ministè olye 10 jan l te vle sa avan. Ansyen kandida pou pòs prezidan an, dakò menm jan ak tout lòt sektè yo pou entansifye mobilizasyon yo pou fòse Jovenel Moïse respekte dat manda li fini 7 fevrye 2021.
Jean-Charles Moïse raple se pa mande y ap mande Jovenel kite pouvwa a, men se pito manda l ki fini, li dwe ale 7 fevrye 2021.
Lidè Pitit Desalin nan fè konnen tranzisyon sa dwe an favè pèp Ayisyen an, pou konbat ensekirite a sou tout fòm nan peyi a.
Jeff Jean Joseph