Youn nan bra dwat chèf gang Jeff moun konnen sou non “Djòl” ki tap dirije yon blòk nan Kanaran tonbe nan echanj kout zam ak lapolis nan kad yon entèvansyon PNH la tap fè nan zòn Koray-Seslès ayè madi 8 novanm nan. “Djòl” se youn nan bandi ki patisipe nan anpil move zak sou wout nasyonal nimewo 1 an tankou brakaj, vòl, detounman kamyon machandiz, kidnapin, kadejak, pou n site sa yo ase.
Depi plizyè semèn Direksyon Depatmantal Lwès 2 polis la tanmen yon ansanm operasyon pou derasinen bandi ki vle kontinye okipe zòn sa a. Fòk nou raple jou ki te 19 oktòb 2022 a, lapolis te arete chèf gang Kanaran 90 la, Jonès Firmin alyas “Timèt” pou enplikasyon prezime li nan asasina Jean Claude Desravine ki te yon anplwaye enstitisyon polisyè a. “Timèt” ak bandi l yo te mete dife sou viktim nan ak tout machin li.
