Tout enfòmasyon yo konfime pandan malèz majistra komin Kenskòf la ayè maten, yo te rele anbilans pou vin chache l men sa pat janm fèt. Se jis aprè l fin mouri yon anbilans te rive nan komin nan alòske Massillon Jean se yon otorite lokal avan tou e yon sitwayen tankou tout lòt sitwayen ki dwe jwenn asistans lè lavi l an danje. Si yon anbilans CAN pat disponib pou al pran Massillon Jean ki malad kounye a se poukisa sa pat fèt? Kiyès ki responsab? Ki rezon ki lakoz okenn anbilans pat rive sou plas pou bay majistra yon premye swen? Sa montre aklè kouman Leta ayisyen banalize lavi moun.

Kounye a, nan sikonstans majistra a mouri a, èske y ap pran dispozisyon pou fè yon medsen lejis egzamine kadav la pou verifye vrè koz lanmò a e poze kesyon ak medsen ki te resevwa l nan lopital kote yo te kouri avè l an ijans lan?