570 goud pou yon galon gazolin, 670 goud pou yon galon dizèl e 665 goud pou galon kewozèn nan, se ak pri sa yo gaz la pral vann nan ponp yo selon minis Kòmès ak Endistri a Ricardin St Jean. Malgre peyi a lòk pandan anviwon 3 mwa pou rezon sa a, gouvènman an pa fè bak sou dezisyon li te pran an. Aprè anons ki fin fèt pou di y ap resi mete gaz disponib nan ponp yo, gouvènman an anonse nouvo pri yo ap tou afiche nan ponp yo.
Depi mwa Dawout 2022, peyi a ap konnen yon moman nwa pou zafè kabiran sa a. Moun pèdi lavi yo, anpil biznis piye, pri manje monte disèt wotè e pandan tout peryòd sa a tou, n ap raple galon gaz la t ap vann sòti 500 pou rive 1000 dola nan divès kwen anndan peyi a.
