Gang « 400 mawozo » ap frape fò depi ayè mèkredi 2 desanm 2020 an nan Komin Gantye. Gang sa ki pa sispann fè pale de li nan sezi machin, epi atak ak zam sou moun ki frekante zòn sa, te sezi yon bis abònman ki te gen 12 ekolye ladan l, maten an. Gang lan ta pral deside libere ti moun yo, men toujou kenbe bis la.
Daprè popilasyon nan zòn Gantye, depi ayè mèkredi 2 desanm nan, anpil kout zam ap chante jiska maten an. Gang « 400 Mawozo » deside kilè komin Kwadèboukè dwe frèt ou byen kilè li dwe cho.
N ap raple gwoup ame sa se youn nan pi gwo gang ki genyen nan plèn nan, ki espesyalize nan sezi machin epi reklame kòb nan men pwopriyetè yo.
Yon sitiyasyon ki mete tout moun k ap frekante zòn sa yo sou anpil estrès. Lapolis, malgre mwayen yo kapab fèb, dwe aji prese prese pou stope emoraji sa.
Jeff Jean Joseph
