Opozisyon politik la rate plizyè okazyon pou te dechouke Jovenel Moïse sou pouvwa a. Youn nan premye okazyon yo se mouvman 6-7 jiyè yo kote peyi a ta pral lòk pou kèk jou, se te nan lane 2018. Jovenel Moïse te oblije kouri fè bak sou desizyon li te pran pou te monte pri gaz la.
Pi gwo mouvman peyi a ta pral konnen se 3 denye mwa lòk nan ane 2019, kote lekòl ta pral fèmen, majorite biznis t ap fonksyone an ralanti. Ak sipò entènasyonal la, Jovenel Moïse rete rèd kou ke makak, li pa fè yon pa.
Opozisyon politik la repliye, epi deside fòk Jovenel Moïse respekte atik 134-2 konstitisyon an, ki fè konnen Manda prezidan an komanse menm ane eleksyon yo fèt la.
Opozisyon an lanse mobilizasyon nan plizyè konferans pou laprès epi anonse mobilizasyon ap komanse apati 15 janvye kap vini la jouk yo rive dechouke Jovenel 7 fevrye 2021.
Eske opozisyon an ap kapab voye Jovenel ale ak mobilizasyon sou beton an sèlman? E si Jovenel deside li pap fè yon pa, kisa opozisyon politik la ap fè?
Jeff Jean Joseph
