Nan yon òdonans jij enstriksyon k ap travay sou dosye prezidan Jovenel Moïse la voye bay dwayen Tribinal premyè enstans Pòtoprens lan, Mèt Bernard St Vil ak tout komisè gouvènman an, Jacques Lafontant, li fè yo konnen, 3 mwa lalwa ba li pou l travay sou dosye sa a, li p ap ka respekte l. Daprè jij Walther Wesser Voltaire, tout moun ki gen non yo site nan dosye a, yo pako fin tande yo.
« Malgre mwen pran syèj nan mwa me 2022, se nan mwa jiyè dosye a rive nan men m », toujou jij la k ap pale. Pou rezon sa yo, nou di e nou deklare, dèle 3 mwa nou genyen daprè atik 7 lwa 26 jiyè 1979 la ki baze sou apèl penal p ap ka respekte paske tout fòmalite yo pa ranpli.
Jij Walther raple , krim sa a se yon krim transnasyonal, fòk lajistis lòt peyi ki site yo ta bay kout men pa yo tou.
