Daprè chif Direksyon Jeneral Pwoteksyon Sivil kominike maten lendi 5 jwen an, gen gwo modifikasyon ki fèt nan kantite moun ki mouri yo. Si avan yo te pale de 15 moun, chif sa a pase a 42 moun dlo touye. Pliske 30 nan kadav sa yo se nan depatman Lwès la yo sòti. Gen 11 moun ki disparèt pandan 13 633 kay inonde. Leyogàn pou kò l gen 19 mò, depatman Sidès, gen 7 mò. Kantite bèt ki mouri menm se pa pale.
Nan tout depatman kote 2 jounen lapli sa yo te tonbe a, gen anpil jaden ki devaste, anpil wout kraze, kay ki pat asire inonde e menm kraze. Entanperi sa yo fè gwo dega lakay peyizan yo.
