Premye minis Ariel Henry al byen pase nan somè an Ajantin pandan l kite yon pati nan popilasyon an ap souke kò yo nan kanaval, yon lòt pati menm ap kriye akoz bandi k ap ba yo pwoblèm, boule kay yo, lajistis ap fonksyone nan enjistis. Nan menm tan sa a, kidnapnig ap fè raj pandan gen gwo bouch louvri nan mitan kò Polis la akoz dènye masak ki fèt sou frè zam yo vandredi pase a. Peyi a lage tankou kabrit nan savann ki san mèt.
Sitiyasyon peyi a tris anpil. Se bandi ak zam k ap fè lalwa tankou se yo menm ki t ap touche lajan Leta. Reyalite sa a ki te kòmanse sou lagraba depi sou administrasyon Jovenel Moïse la vin 4 fwa pi grav jodi a malgre divès pwomès entènasyonal la fè.
