Ansyen senatè Antonio Chéramy, anpil moun konnen sou non Don Kato, anonse li kreye pwòp estrikti politik li ki pote non : «Matris Liberasyon».
Nan entèvansyon li sou radyo Méga (nan Pòtoprens), Don Kato fè konnen «Matris Liberasyon» regwoupe plizyè kategori moun tankou etidyan, elèv ak pwofesè ki non sèlman pa t vle rantre nan politik, men tou ki pa t nan ni PHTK ni opozisyon an tankou «Sektè demokratik e Popilè».
Pou ansyen senatè a, desizyon sa a pa vle di l vire do bay opozisyon an. «Mwen toujou manm “Sektè demokratik e Popilè” a. Pa gen okenn kraze kite sa bò kote m men sa pa anpeche m monte estrikti politik mwen», se deklarasyon Don Kato ki defini objektif estrikti a: «Matris Liberasyon se yon zouti politik pou n konbat PHTK, sistèm oligachik la epi goumen pou lavi moun ki pi mal yo vin pi bon».
Okenn dat, pou n’ repete Antonio Chéramy, poko kenbe pou lansman estrikti a ofisyèlman.
Wilner Jean
