Enspeksyon jeneral polis nasyonal la (IGPNH), nan yon ankèt y ap mennen deja jwenn pi piti 70 polisye ki fè pati “Fantôme 509”. Gwoup ki rele tèt yo “Fantôme 509” la te foule beton an plizyè fwa pou ekzije pi bon kondisyon nan lapolis la. Chak fwa yo sòti yo boule plizyè machin ki plak sèvis leta.

Ankèt enspeksyon jeneral la poko fini. Men ankèt la pèmèt yo idantifye 70 polisye ki fè pati “Fantôme 509”. Se pòt pawòl Enspeksyon jeneral polis nasyonal la, Jonet Vital, ki konfime enfòmasyon sa yo, nan yon konferans pou laprès jounen madi 8 desanm nan.

Nan 70 polisye ki fè pati “Fantôme 509” la, enspeksyon jeneral deja tande 60 ladan yo. Gen 10 lòt ki pat reponn a konvokasyon ki te fèt la. Nan sans sa enspeksyon jeneral deside kenbe chèk polisye sa yo.

IGPNH anonse, aprè l fin tande polisye ki endekse yo, l ap boucle ankèt li, epi fikse responsabilite yo.

N ap raple objektif “Fantôme 509” la, se ekzije pi bon kondisyon travay pou polisye ki anndan enstitisyon an. Yo toujou fè konnen yo pa gen jou, yo pa gen lè, se bawon k ap dirije yo.

Jeff Jean Joseph