Bandi ak zam kontinye fè lwa yo nan kapital la. Pa gen yon jou ki pase pou plizyè ka kidnapin pa anrejistre nan zòn metwopolitèn nan. Nan lannwit dimanch 6 desanm nan, bandi ak zam kidnape Magdala Louis ki t ap sòti nan yon gradyasyon, daprè fanmi an.

Ravisè yo te mande 1 milyon dola nan yon premye tan pou libere dam nan. Aprè yo deside retire ladann. Yo mande fanmi an 800 000 dola ameriken pou libere Magdala.

Daprè enfòmasyon ki rive jwenn ekip Haïti News lan, Magdala Louis pa gen ni manman ni papa. Li p ap viv ak mari l; li gen yon grenn pitit. Pou l te chèche lavi li te konn boukannen sosis epi l te gen yon bak sirèt nan yon premye tan.

Magdala Louis se yon moun k ap bat dlo pou fè pou l viv. Depi ayè swa dlo paka seche nan je fanmi an ki pa gen ni rele, ni reponn, ki pakab reponn ak bezwen bandi yo.

Fas ak sitiyasyon sa, plizyè sitwayen te deside bloke Nazon ak plizyè zòn nan anviwon an pou mande otorite konsène yo fè yon bagay pou yo.

N ap raple zak kidnapin tèlman fèt ak repetisyon anndan peyi a, li rantre nan kotidyen ayisyen. Yon bagay ki tankou lanmò, kote pèsòn isi ba pa enpanye.

Jeff Jean Joseph