«Sou yon total 20 espas penitansyè nou vizite nan kad yon etid, sèlman 5 ki dispoze pwogram fòmasyon pou prizonye yo», se sa Rezo nasyonal k’ap defann dwa moun yo rezime nan yon etid li pibliye nan dat 27 oktòb pase a.

Daprè rapò a, 5 espas sa yo se CERMICOL, prizon sivil Kwa-dè-boukè, Kafou, Kabarè ak Fòlibète. RNDDH presize CERMICOL ki genyen timoun ki an detansyon yo, dispanse yon fòmasyon kontini, anplis 5 kou tankou plonbri, kòdonri, kouti, enfòmatik ak anglè.

Nan prizon Kwa-dè-boukè a, prizonye yo aprann koud. Sant kaseral la dispoze plizyè machin nan lide pou asire aprantisaj prizonye yo.

Nan prizon Kabarè a ki genyen anviwon 238 fanm ofri plizyè fòmasyon: enfòmatik, makrame, kwizin, anglè ak kouti, se sa RNDDH mansyone nan etid la.

Sant kaseral la dispoze plis pase 20 òdinatè, san konte machin ak lòt materyèl pou yo aprann koud. Prizon Kabarè a ofri tou plizyè lòt kou pami yo karelaj, kosmetoloji ak preparasyon pwodui chimik.

Wilner Jean