Lidè Pitit Dessalines nan, Jean Charles Moïse, revele, sou radyo Magic 9, madi 20 oktòb la, rezon ki lakoz plizyè manb nan opozisyon an ap chèche dekredibilize l. «Se paske m refize rantre nan lojik pataje gato (pouvwa) ki lakoz genyen yon kanpay ki lanse nan opinyon piblik la pou denigre m», se deklarasyon ansyen senatè depatman nò a.
Jean-Charles Moïse, ki pa t vle site okenn non, fè konnen plizyè lidè nan opozisyon an toujou itilize non pèp la pou yo jere enterè pèsonèl yo. « Sou pouvwa tranzisyon Jocelerme Privert a, anpil aktè nan opozisyon an te fè anpil richès. Puiske m te aksepte Jocelerme Privert kòm prezidan, tout moun k ap tire flèch sou mwen jodi a te pran m pou bon moun nan epòk la», se deklarasyon Jean-Charles Moïse ki di li rekonèt, aksepte Jocelerme Privert, se youn nan gwo erè politik nan lavi l.
Jean Charles Moïse di menm jan li te kont Henry Céant, l ap toujou kanpe anfas tout moun nan opozisyon an ki vle tranzisyon pou yo ka regle zafè mesken yo.
Yon lòt kote, ansyen majistra Milo a voye jete tout akizasyon ki fè kwè li se jwè PHTK epi yon pyon pou Tonton Sam.
Jean-Charles Moïse, ki pa t mete dlo nan bouch li, raple Edmonde S. Beauzile ki fè plizyè revelasyon frakasan sou li: « Non sèlman ou (Edmonde S. Beauzile) te vote nan Palman an favè Premye minis Laurent Lamothe, yon Petrovòlè, men tou FUSION te genyen pòt fèy ministeryèl li (Ministè zafè sosyal ak travay), nan gouvènman Martelly-Paul la.
Wilner Jean
