Premye minis ayisyen an Joseph Jouthe bay asirans ”ni li ni Jovenel pa genyen okenn konplisite ak gwoup gang yo”.
M. Jouthe fè konnen, Jimmy Chérizier alyas ”Babekyou” pa p sipòte pouvwa menm si l te kritike epi menase plizyè figi nan opozisyon politik la kont divès manifestasyon kont gouvènman an, 17 Oktòb pase a.
Daprè chèf Konsèy Siperyè polis nasyonal la (CSPN) se nan imajinasyon kèk moun lide sa ye. Li ajoute, ” nou pa bezwen bandi pou pwoteje n”.
Dezyèm sitwayen nasyon an, ki denonse gwoup gang yo k ap simen latwoublay nan plizyè zòn peyi Dayiti sitou nan kapital la Pòtoprens, pwomèt la p aji. ”Lawouze taye banda l toutan solèy pa leve”, li deklare pou fini.
N ap raple, lidè gwoup gang G9 an fanmi ak alye a Jimmy Chérizier, alyas ”Babekyou”, genyen divès akizasyon sou do l pami yo enplikasyon prezime l nan plizyè atak nan Gran Ravin (2017), nan Lasalin (2018), nan Bèlè (2019), pou n site sa yo sèlman, daprè rapò Biwo Entregre Nasyonzini yo an Ayiti (BINUH) te pibliye nan mwa dawout pase.
Pooshy Rosana
