Me Bernard Sainvil, dwayen tribinal premyè enstans Pòtoprens lan, mande pou otorite yo ranfòse sekirite jij Renord Régis k’ap mennen enstriksyon sou dosye asasina Me Monferrier Dorval la.
Daprè konfimasyon Me Bernard Sainvil, enstriksyon dosye asasina Me Monferrier Dorval la demare mèkredi 7 oktòb 2020 an.
Nan moman an, jij enstriktè a, Renord Régis, odisyone 4 prezime asasen yo ( Mackender Fils-Aimé, Modler Sénégeau, alias Abidy, Valéry Dort ak Dunès Vilpique) otorite polisyè yo te arete nan kad dosye sa a.
Jij enstriktè a, dapre Me. Bernard Sainvil, adrese yon premye pwosè-vèbal entèwogatwa premye konparisyon.
Me. Bernard Sainvil fè konnen majistra Renord Régis pral voye yon korespondans bay dekana a pou l mande l fè entèvansyon l bò kote Konsèy siperyè pouvwa jidisyè a nan objektif pou mete mwayen disponib pou l reyalize enstriksyon an.
N’ap raple Monferrier Dorval tonbe anba bal bandi, nan dat 28 dawout pase a, lakay li nan Pèlerin 5.
Wilner Jean
