Depi kèk jou, gen yon bato siman ki sòti nan peyi Kolonbi ki bloke nan pò Sen Lwidisid. Jiskaprezan, Direksyon Jeneral Dwàn yo poko janm bay aksè pou bato a debake alòske gen anpil kamyon ki kanpe ap tann siman pou al pataje nan divès kwen nan depatman Sid la. Pliske poko gen okenn eksplikasyon ki bay sou rezon ki fè bato sa a poko ka debake, anpil vwa kòmanse leve nan peyi a pou bato kapab debarase.
Gen chanm Kòmès ak Endistri nan Gran Sid peyi a ki deja sòti yon nòt pou mande Ladwàn degaje l otorize bato sa a livre machandiz lan. Pou anpil moun, se yon operasyon bòykotaj k ap fèt kont pò Sen Lwidisid la pou menm ti gwoup ki konn achte siman lòtbò dlo yo ka kontinye fè l.
