Daprè pawòl youn nan avoka Guy Philippe yo ki se Louisher Jean Joseph, ansyen senatè eli depatman Grandans lan ap refoule sòl ayisyen an jedi 7 septanm k ap pwoche la a. Daprè sa avoka a di, Guy ap retounen pou l vin kontinye batay li t ap mennen bò kote pèp ayisyen an. Yon anons Guy Philippe li menm te deja fè semèn pase a nan yon mesaj vokal.
N ap raple Guy Philippe te kondane an 2017 nan peyi Etazini pou l te pase 9 lane nan prizon pou trafik dwòg ak blanchiman lajan. Lè l retounen an Ayiti, DCPJ ta dwe kenbe l anndan li ranpli kazye jidisyè li avan li rejwenn libète l nèt al kole, daprè sa yon espeyalis an dwa fè konnen. Sèlman n ap fè remake Guy Philippe pa fin fè tout nèf lane a nan prizon.
