Pwoblèm yo miltipliye pa mil nan peyi d Ayiti. Gaz ap vann nan lari kounye a paske ponp pa alamòd. Pa gen manifestasyon kont dola ameriken an k ap toupizi goud la ankò, tout lopital Leta yo malad, bandi ranplase Lapolis e se yo ki fè lalwa. Lekòl ap fonksyone pa relèv e mete sou sa, pou yon moun manje se yon gwo kalamite. Pòtoprens se pi gwo kote ki rezève kòm santral pou yo anpile fatra. Sa pa anpeche fanm ak gason ki sou pouvwa yo kontinye kale pèp la bèl vag.
Dwa pou moun viv, manje, bwè, ale lekòl, jwenn swen sante, lwazi ak distraksyon, sa yo se nan liv yo egziste. Lavi pa vle di anyen nan peyi d Ayiti kote sèl rekou Leta sere pou tout moun se yon grenn bal oubyen yon viza imanitè.
