Ankèt k ap mennen sou asasina ansyen prezidan Jovenel Moïse la pran yon lòt pataswèl. Jij enstriksyon ki te sou zafè a, Garry Orélien, sòti kò l nan dosye a jodi vandredi 21 Janvye 2021 a.
Nan yon òdonans li ekri bay dwayen tribinal Premye Enstans Pòtoprens lan, Mèt Bernard Saint-Vil, jij Garry Orélien fè konnen li pap enstwi dosye a pou konvnans pèsonèl.
Yon desizyon li ta pran aprè divès rapò Rezo Nasyonal k ap Defann Dwa Moun (RNDDH, nan sig fransè ) revele li te resevwa kòb nan men ansyen direktè polis Léon Charles pou te tande l sou ankèt k ap mennen sou lanmò JoMo 7 fevriye pase a, san konte genyen lòt zak koripsyon nou pa site.
Jij Garry Orélien te deklare « akizasyon sa yo se te pou sal entegrite l, pou sal imaj li ak fanmi l. Se manti yo ye. »
N ap raple kèk jou avan sa, misye Orélien te mande yon delè pou l abouti ak dosye a. Yon demann Mèt Bernard Saint-Vil te voye jete byen lwen.
