Madanm chantè ak pwodiktè ameriken an Kanye West rann ofisyèl demand divòs li vandredi 19 fevriye pase a. Daprè plizyè medya ameriken, pami yo People, Kim Kardashian pa swete kontinye viv ansanm avèk Kenya West aprè 7 lane maryaj.
Alòske enfliyansez 40 lane a fè konnen Kanye West pa genyen menm anbisyon ak li, epi li pakonn fè konpwomi, pa bò kote pa l rapè afwo-ameriken an deklare rezon divòs la se kèk deklarasyon li te fè pandan kanpay li pou prezidansyèl ameriken an ane pase. Ansyen kandida a te deklare : ‹‹li te vle fè madanm li avòte premye pitit li ”North”, men Kim pa t dakò. Se gras ak Kim ki fè pitit sa la jodia.››
Manman 4 pitit la (North, Saint, Chicago ak Psalm) ki sou 3èm divòs li, jije Kanye West te dwe kenbe kèk bagay an prive, daprè BBC News.
Si divòs la fè tou 2 sipèsta yo mal, Kim Kardashian anonse li pra l gen tan kounya pou okipe tèt li ak pitit li yo–menm si se tou lè 2 k ap gen gadinay timoun yo. Bò kote pa l, Kanye West kòmanse vann kèk kado li te bay ansyen madanm li epi deklare li pa vle genyen okenn atachman ak lepase.
Pooshy Rosana
