Premye minis lan, Joseph Jouthe enstale jounen lendi 16 novanm 2020 an, nouvo direktè lapolis la, Léon Charles. Nouvo direktè jeneral la ranplase nan pòs sa, Rameau Normil, ki te gen sèlman 14 mwa nan tèt enstitisyon an.

Lokatè primati a pat mete dlo nan bouch li pou mande nouvo direktè a pou li degajel kou mèt Jan Jak pou fè lapè tounen anndan peyi a , paske li menm li anvi mache jan li vle.

“M’ anvi danse yon ti enposib, Tonimix, m’ anvi ale nan yon ti sourit vilaj de dye, m’ anvi tout dyaspora ka vin nan peyi a monte desann jan yo vle, bèl fanm ak bèl gason ak bikini sou yo ap mache benyen nan bèl plaj nou genyen nan peyi a« , se deklarasyon premye minis lan, Joseph Jouthe.

Depi kèk mwa se bandi ak gwo zam nan men yo k’ap kontwole plizyè perimèt anndan peyi a. Malfra yo deside kilè yo ka kidnape, touye epi vyole.

N’ap raple Koze « kidnapping » nan tounen yon fleyo pou pèp ayisyen an, ki depi kèk tan ap dekapitalize pi plis, nan defèt sa yo te genyen kòm byen pou peye ranson pou jwenn liberasyon pwochen yo.

Jeff Jean Joseph