Byen bonè nan maten, PNH la te gen alèt sou yon machin sispèk ki te sòti depi Montay Nwa. UDMO Lwès 1 ak SWAT te pouswiv li jiska Dèlma 83 kote youn nan prezime bandi yo tonbe nan echanj ak fòs lòd yo, yon kalachnikov sezi ak tout machin nan ki konn patisipe nan kidnaping. Nan menm jounen an, Jean Bernard Lonicia alyas “Ti Bernard”, Wenson Dérismé ak Chington Décenat jwenn arestasyon yo. Mesye sa yo konn detounen kamyon nan Nò kapital la.
Daprè PNH la, mesye sa yo konn ap evolye nan zòn Sodo ak Dibison kote yo konn brake sou chofè yo pou detounen kamyon machandiz. Pou sa ki gen awè ak dosye kidnaping nan, bandi yo te kidnape mèt machin nan e yo te tou konn itilize l pou fè lòt anlèvman daprè enfòmasyon enstitisyon an dispoze.
