Chak fwa bandi kidnape youn nan nou ou byen yon moun nan sektè pa w ou kanpe pou di aba kidnapin. Si nou rete ap aji konsa, nèg ak zam ap kidnape nou grenn pa grenn. Chak moun ap tann kou pa yo, aprè pou n di non kont zak kidnapin. Poukisa nou pa leve kanpe ansanm pou nou di non a move zak sa yo k ap wonje sosyete a ?
Kidnapin nan se pi gwo endistri k ap mache nan peyi Dayiti. Kidnapè yo ka fè konbyen milyon dola ameriken nan yon semèn. Dayè bandi yo pa bezwen konnen ki ran sosyal ou ; èske milyon y ap mande w la ou ka bay li.
Kisa n ap tann pou nou tout leve kanpe pou nou di aba kidnapin, aba ensekirite jeneralize sa a? Pou n fòse leta pran responsiblite l, pou yo sispann touche lajan taks nou yo san yo pa bay okenn sèvis vre. Ann pa rete sou rezo yo, ann mete pye nou atè pou nou di ase ase. Sa ale twò lwen.
