Premye minis Joseph Jouthe mande arete tout polisye “Fantom 509” yo, daprè li menm, ki se vagabon, teworis epi bandi ki gen inifòm polis nasyonal la sou yo k’ap teworize peyi a. Yon deklarasyon ki vini aprè yon ènyèm sòti Fantom 509 nan kèk ri nan kapital la.
« Jodi a m’ap lanse yon apèl pou gen tolerans. Nou p’ap ka tolere vagabon, teworis ak inifòm lapolis ki pran peyi a an otaj« , deklarasyon chèf CSPN nan ki kontinye pou li di: « Nenpòt bandi nenpòt koulè rad ki sou li, fòk li fouke ».
Lokatè Primati a fè konnen Leta poko gen mwayen pou l’ fè ti kat polisye yo sòti nan 10 000 pou rive nan 25 000 g. Premye minis lan montre plen lòt kategori sosyal tankou medsen, enfimyè, oksilyè ak pwofesè ki poko ka jwenn ogmantasyon ak avantaj yo merite paske leta poko gen mwayen pou sa.
N’ap souliyen koze ti kat sa poze tèlman pwoblèm anndan polis nasyonal la, li ta pral pouse Rameau Normil jwenn revokasyon li. Daprè Joseph Jouthe ki te bay yon entèvyou ak jounal “Le Nouvelliste”, ansyen direktè a, san konsiltasyon pèsonn, te deside fè pase frè ti kat polisye yo sòti 10 000 goud rive nan 20 000 goud.
N’ap raple se pa premye fwa manm ekzekitif la trete polisye Fantom 509 yo teworis, yon deklarasyon ki pa anpeche eleman sa yo kontinye fè pase revandikasyon nan jan ki fè yo plezi.
Jeff Jean Joseph
