Nan yon nòt vokal ki depase plis pase 20 minit, Joseph Félix Badio ki se youn nan akize nan lanmò Jovenel Moïse la di li dispoze pou lajistis tande l nan dosye Jovenel Moïse la. Li fè konnen Pierre Espérance pa konn anyen nan zafè dwa moun e li trete l de mantè sou dosye asasina prezidan an. “Si mwen menm konn koulè baryè kay Jovenel, nou mèt touye m pou Jovenel jwenn jistis”.
Félix Badio fè konnen nan nòt vokal sa a, rapò ki fèt la pat janm fèt nan DCPJ. Rapò ki fèt la se yon rapò politik. Mesye a fè konnen, tèks ki ekri a se yon matrakaj puiske yo pat janm bay nimewo kay yo di li te lwe bò lakay prezidan an. Li di li prè pou l met vi l sou tab la pou bagay sa a pa repete nan peyi a ankò paske manti dwe fini nan peyi a.
