Nan yon lèt k’ap sikile sou rezo sosyal yo kote Haïti News rive verifye otantisite l, “Corps d’intervention maintien d’ordre” (CIMO) ekri chèf Konsèy siperyè polis nasyonal la (CSPN), Joseph Jouthe, ak direktè polis la, Léon Charles, pou fè konnen yo pa pral tire sou Fantom 509 k’ap mande ogmantasyon kòb ti kat la.

Mesye CIMO yo fè konnen wo kòmandman an pa ka mande yo al tire sou Fantom 509 k’ap mande ogmante salè yo.

Kò CIMO a rapousib pou akize wo komandman an ki, daprè yo menm, abitye bay lòt moun inifòm CIMO pou al fè vye zak.

Toujou daprè lèt sa, depi mwa septanm polisye yo pa resevwa tikat la, poutan se youn nan pi gwo espwa majorite polisye paske daprè enfòmasyon yo tout polisye pran kout ponya nan BNC.

Polisye CIMO yo fè konnen gen pafwa se manje nan baz la yo mete nan valiz yo pou pote lakay yo, bay madanm ak pitit pou manje.

Kò CIMO a pran pozisyon sa a aprè Premye minis Joseph Jouthe te kalifye polisye Fantom 509 yo teworis epi mande pou fòs lòd yo arete yo.

Jeff Jean Joseph