Endividi ak zam yo pa rive idantifye kidnape Mike (Mischael) Bellot, jèn ayisyen ki fè valiz ak pano solèy la ”Solo Bag”.
Kidnapè yo anlve jenn gason 29 lane a ayè samdi 16 Janvye 2021 an, daprè jounalis Luckson Saint-Vil sou paj Facebook li.
Jiska prezan pako genyen okenn detay sou zòn yo kidnape Mike Bellot a ak ki revandikasyon ravisè yo.
N ap raple, Mike Bellot, se yon antreprenè ki make prezans li anpil nan peyi Dayiti ak nan rès mond lan, sitou avèk kreyasyon l ”Solo Bag”, yon valiz ki genyen enèji solè disponib pou itilizatè l.
Li resevwa anpil distenksyon tankou nan men Jèn chanm entènasyonal (JCI) pou ane 2019 la, Forbes Magazine kòm youn pami 10 ayisyen ki konn pwodwi, epi dènye distenksyon l sòti nan lis 100 moun Meaningfull Business chwazi kòm lidè oubyen antreprenè devlopman dirab, nan dat 21 oktòb 2020 an.
Aprè l te kòmanse divès etid nan peyi Dayiti, li te jwenn yon bous pou Taywan, kote l diplome nan politik ak ekonomi entènasyonal epi nan komès entènasyonal. Mike (Mischael) Bellot chwazi retounen lakay li an Ayiti pou vin sèvi kominote a.
Li se yon viktim anplis nan lis moun bandi ak zam kidnape nan peyi a, kote fenomèn ensekirite a pa sispann vale teren.
Pooshy Rosana
