Pou denonse fenomèn ensekirite a k ap vale tèren nan peyi Dayiti, sitou nan zafè kidnapin, plizyè sitwayen te òganize yon sit-in devan rezidans ofisyèl Premye minis ayisyen an, Joseph Jouthe.
Madi 19 janvye a plizyè dizèn moun ak kèk pèsonalite piblik, pami yo ekonomis Etzer Émile ki se youn nan òganizatè yo ak mizisyen Yvon Jérôme, te reyini nan Miso, Boudon, nan komin Petyonvil pou t al fè mesaj yo pase devan kay chèf Konsèy siperyè polis nasyonal la (CSPN).
Pankat nan men, yo denonse zak anlèvman k ap fèt lannwit kou lajounen nan peyi Dayiti, alòske otorite yo fè silans.
Pandan mobilizasyon an, ki batize »ANGAJMAN », lapolis te fè izaj gaz lakrimojèn pou tante epapiye pwotestatè yo, kòmkwa yo pa t siyale lapolis evènman sa. Men sa pa t anpeche mouvman pasifik la kontinye.
Apa sikilasyon an ki te bloke akòz revandikatè yo te kouche nan tout lari a, chèf gouvènman te eseye pale ak inisyatè sit-in yo, men akòz sitiyasyon an te kòmanse pran yon lòt anplè Joseph Jouthe te oblije retounen sou desizyon l.
N ap raple pandan menm jounen madi 19 janvye a, te gen plizyè lòt sit-in ki te òganize nan kapital la pou denonse fenomèn ensekirite a.
Pooshy Rosana
