Mèt André Michel deklare, pwochen mobilizasyon kont pouvwa anplas la pra l fèt devan Anbasad amerikèn nan dat 20 janvye 2021 an, menm jou ak envestiti 46è prezidan ameriken an, Joe Biden.
Nan yon konferans pou laprès ak sou kont Twitè’l, »avoka pèp la » fè konnen 20 janvye 2021 an, se ap yon okazyon pou y al di »li lè li tan pou Ameriken sispann sipòte Kriminèl ak kowonpi ki sou pouvwa. Nou pra l di manda Jovenel Moïse ap fini 7 fevriye 2021 ».
Malgre manifestasyon 15 janvye pase a pa t fè resèt sa pa anpeche pòt pawòl Sektè demokratik ak popilè a kontinye mobilizasyon l yo kont pouvwa anplas la.
Plizyè nan yo te ekri Nasyonzini ak lòt enstans entènasyonal pou mande koutmen pou chavire prezidan Jovenel sou pouvwa, men demach yo pat ateri.
N ap raple, kèk lidè nan opozisyon politik la lanse plizyè jounen manifestasyon kont rejim PHTK pou dènye jou sa yo, men lapolis deja resevwa lòd pou bare chimen yo, sitou sou wout ayopò a.
Pooshy Rosana
