Depi samdi 12 desanm 2020 an, plizyè inite espesyalize nan PNH la, sou lòd chèf polis la, Léon Charles, tabli baz yo nan Vilaj de Dye pou kapab deloje bandi yo epi retabli lapè nan rantre Sid kapital la. Se 2e operasyon fòs lòd yo mennen, aprè yon premye operasyon ki pat bay gwo rezilta.
Lapolis kraze plizyè kay nan vilaj la, ki se kachèt nèg ak zam, daprè kèk sous. Plizyè sitwayen te foule beton an jodi lendi 14 desanm nan pou denonse konpòtman lapolis, ki daprè yo menm, kraze kay yo pou anpeche yo rete nan Vilaj la.
“Tout moun gran moun nan Vilaj de Dye. Se nou menm k ap bat dlo pou fè bè. Prezidan an te di l ap met manje nan asyèt nou, li pa fè anyen pou nou. Se pou Jovenel bay talon l pou pèp la ka viv”, deklarasyon yon sitwayen nan zòn nan.
N ap raple lapolis la poko bay okenn bilan pou 2e operasyon sa yo mennen anndan vilaj la. Daprè chèf polis la se pou lapè ka retounen nan antre Sid kapital la.
Jeff Jean Joseph
