Medsen lopital jeneral yo, te foule beton an ayè samdi 28 novanm 2020 an, pou ekzije liberasyon konfrè yo, Doktè Hans David Thélémaque, bandi ak zam kidnape epi sekestre ayè samdi. Medsen yo deside pase nan yon lòt faz, kanpe sèvis lopital jeneral jiskaske Dr Hans David Thélémaque libere.
Daprè youn nan medsen yo ki te sou beton an, ki trè pwòch David Thélémaque ravisè yo mande 50 000 dola ameriken ak 200 000 dola ayisyen pou libere jèn medsen an. Medsen yo fè konnen Thélémaque ap touche sèlman 9 000 goud.
Pandan medsen lopital jeneral deside kanpe travay jouk yo jwenn liberasyon Doktè David Thélémaque, gen 2 lòt lopital piblik anndan peyi a, ki deside fè menm jès la tou. Se lopital jistinyen Okap ak matènite Izayi Janti ki deside kanpe travay pou kapab jwenn liberasyon konfrè yo.
Jeff Jean Joseph
