Aprè plizyè plent popilasyon an sou zak vòl, sitou vòlè k ap kase kay, vòl motosiklèt ak telefòn nan vil Fòlibète, lapolis pase alaksyon.
Nan yon operasyon ki dewoule nan lannwit jedi 16 pou rive vandredi 17 jiyè 2026 la, fòs lòd yo arete Carl-Henry Audigé, 30 an, ak Borgella Stanley, 29 an, nan zòn Mòn Kas. Plizyè motosiklèt, pami yo yon moto twa wou ak yon moto de wou, sezi nan kad operasyon an.
Daprè enfòmasyon komisarya Fòlibète pataje ak laprès, Borgella Stanley ta fenk soti nan prizon Fòlibète a depi anviwon de mwa.
Lapolis envite nenpòt moun ki te viktim vòl motosiklèt pou pote pyès ki nesesè yo nan komisarya a pou verifye si motosiklèt yo pa pami sa yo rekipere yo.
