Jounen Dimanch 19 novanm 2023 sa a, vijilans meteyo a leve pou peyi d Ayiti daprè sa Direksyon Pwoteksyon Sivil pibliye sou kont X li. “Alèt la tou leve ni pou depatman ki te anba alèt oranj yo, ni pou rès yo ki te anba alèt jòn yo. Depatman Lwès, Sid, Sidès, Nòdwès, Grandans ak gòf Lagonav kapab resevwa lapli pandan jounen an”, se sa DPC ekri.
Aprè jounen lapli a yè ki te bout jiska maten samdi a, anpil dega anrejistre sitou nan milye pwovens yo kote anpil jaden inonde ak wout bouche. Se ka pou yon twonson wout ki relye Okay ak Jeremi ki bloke akoz yon deboulonnman tèren.
