Mèt Berto Dorcé ki se minis jistis ak sekirite piblik peyi Dayiti te dwe antre nan peyi Etazini jedi 27 oktòb la. Lè li rive sou kontwa a pou l tcheke, yo fè l konnen viza l anile, li p ap ka ale kay Tonton Sam. Sa ki lakoz deplasman minis jistis la vin pa posib daprè yon sous nou ka fè konfyans. Li fè pati lis ofisyèl Depatman Deta ameriken bloke viza yo a.
Depi nan koumansman mwa oktòb la, bri a t ap kouri kote otorite amerikèn yo te pran bon jan mezi pou bloke viza tout ofisyèl ayisyen ki nan relasyon ak gang yo. N ap raple nan lis sa a, gen senatè an fonksyon, ansyen depite ak moun ki fè pati gouvènman Ariel Henry a nan moman an.
