Ansyen direktris SMCRS la, Magalie Habitant konfime sou antèn radyo Majik 9, se li menm ki te al dèyè 2 Dominiken yo ak entèprèt la, Ti nèg, jou ki te vandredi 26 fevriye a, nan men ravisè yo ant ri Chavàn ak ri Kapwa nan yon Prado ki gen koulè nwa.

Daprè madanm Habitant, ki se yon pwòch pouvwa a, li te mennen mesye yo nan komisarya Dèlma, kote yon komisè polis te resevwa yo, avan l te voye yo nan DCPJ.

Magalie Habitant fè konnen se yon sèvis li t ap rann. Se enstans konsène ki te negosye pou liberasyon mesye yo ki te kontaktel pou l kapab rekipire mesye yo.

N ap raple ansanm deklarasyon sa yo vini aprè Junior Albert Augusma yo konnen sou non « Ti Nèg » te fè konnen gen yon Prado blan bandi yo te fè yo monte ki lage yo tou pre Chavàn nan, aprè se Magalie Habitant ki vin dèyè yo nan yon Prado Nwa.

Anpil moun pa sispann poze tèt yo kesyon, ki koneksyon ki genyen ant pouvwa a oubyen pwòch pouvwa a ak bandi yo? Lè yo konnen Magalie Habitsnt se yon ansyen direktris nan administrasyon Jovenel Moïse la.

Jeff Jean Joseph