Depi kèk jou jounalis tounen sib politisyen PHTK ak lapolis ki pa janm sispann ba yo bal kawotchou chak fwa gen manifestasyon. Amélie Baron ki se jounalis korespondan AFP ap sibi gwo menas anba men pwopwagandis PHTK yo, daprè jounalis ak propriyetè radyo IBO a, Herold Jean-François.
“Pwopagandis PHTK sible Amélie Baron ki se jounalis korespondant AFP (Ajans Frans Près) epi ki kolabore ak lòt medya peyi Lafrans. Amélie se yon pwofesyonèl ki sou teren an ak lòt konfrè Ayisyen pou bay aktyalite a jan li pase. Amélie adopte peyi n, nou solidè ak li nèt al kole”, deklarasyon Herold Jean-François nan yon tweet.
N ap raple jou ki pase yo, lapolis te vide yon bonbòn gaz lakrimojèn nan machin radyo tele PACIFIC ki te chaje jounalis.
Ayè dimanch 14 fevriye a gen 2 jounalis ki viktim nan mach ki t ap fèt kont diktati Jovenel Moïse bezwen enstale nan peyi a. Pami yo, yon jounalis Kapital Fm ki resevwa pou pi piti 10 bal kawotchou nan men yon polisye.
Nan pwojè diktatoryal sa ki kòmanse enstale anndan peyi a, laprès se premye sib lapolis ak patizan PHTK.
Jeff Jean Joseph
