3 machin chaje ak polisye debake lakay ansyen senatè Antonio Cheramy tout moun konnen sou non Don Kato, nan aprè midi vandredi 29 janvye a. Daprè dirijan òganizasyon Matris Liberasyon an, lapolis debake lakay li san okenn motif, epi pa t gen okenn rezon legal pou sa.
Ansyen Senatè Depatman Lwès la fè konnen nan moman aksyon sa li pa t nan kay la, se yon tifrè li ki te la. “ Ti frèm nan te oblije chape pou l li pou l pa t viktim anba men polisye sa yo” deklarasyon Cheramy.
Opozan fawouch pouvwa Jovenel Moïse la denonse konpòtman abitrè fòs lòd yo, epi pwomèt pou l kontinye goumen kont rejim PHTK a jouk Jovenel bay talon li 7 fevriye 2021.
N ap raple aksyon sila rive sèlman kèk jou avan opozisyon an komanse ak mobilizasyon “Non Stop” pou mande Jovenel Moïse respekte atik 134-2 kontitisyon 1987 la.
Jeff Jean Joseph
