18 novanm 1803 make yon dat istorik nan listwa pèp ayisyen an. Se jou sa a, nan Vètyè, nan nò peyi a, lame endijèn nan te ranpòte yon viktwa desizif sou twoup fransè yo, aprè yon batay ki te make detèminasyon zansèt yo pou mete fen nan sistèm kolonyal la ak esklavaj. Batay sa a, ki te dewoule anba direksyon jeneral Jean-Jacques Dessalines, te reprezante youn nan dènye gwo etap nan lit pèp ayisyen an pou libète li. Kouraj ak detèminasyon sòlda endijèn yo te pèmèt yo mete lame ekspedisyonè fransè a nan gwo difikilte, sa ki te prepare teren pou pwoklamasyon endepandans Ayiti, 1ye janvye 1804.
Vètyè rete yon senbòl rezistans, inite ak sakrifis nan listwa Ayiti. Viktwa sa a montre kapasite yon pèp ki te anba dominasyon pou leve kanpe, pran desten li nan men li epi batay pou dwa li genyen pou l viv lib.













