Direksyon Jeneral polis la anonse jodi lendi 5 septanm lan chèk polisye ki te sòti nan 31e pwomosyon Lapolis la ap disponib apati demen madi 6 septanm nan. Yo se 600 polisye ki te sòti 17 desanm ane pase a ki pat ko janm touche depi plis pase 8 mwa yon salè mizerab 19 000 goud.
Minis finans peyi a, Michel Patrick Boisvert te deja di se pat li menm ki te bloke pwosesis la. Nan sans sa a, SYNAPOA ki se sendika polisye yo bat bravo pou nouvèl sa a ki tonbe tankou yon gout dlo pou koupe swaf ajan sa yo ki te deja ap bourike pandan yo pat janm ko resevwa lajan yo. Finalman, aprè 8 mwa, polisye sa yo ka di yo pral souse premye zo yo nan PNH la.
