Pandan prèske tout gran vil nan peyi a leve kanpe pou rele aba lamizè ak twoub politik, lavi chè, kriz gaz elatriye, plizyè manifestan ap pran gaz, gen sa ki blese ak bal gen lòt ki pèdi byen yo; sa pa anpeche premye minis la ak yon ekip pran avyon ale Etazini jodi mèkredi 7 septanm nan.
Daprè yon nòt primati a pibliye jodi a, Ariel Henry pran avyon pou ale kay Tonton Sam pou rankontre yon ekip entreprenè yo di k ap vin envesti nan peyi a. L ap tounen vandredi k ap vini la a. Kesyon anpil sitwayen ap poze se èske premye minis de facto a kreye kondisyon pou antreprenè vin mete lajan yo isit la.