Manm kongrè ameriken an ki se depite Sheila Cherfilus McCormick deklare yo pral voye yon lèt bay administrasyon Biden nan pou mande l pran sanksyon kont tout ayisyen ki gen nasyonalite amerikèn ki nan relasyon ak gang. Gen demach k ap fèt la a tou pou pèmèt kèlkeswa moun non l site nan trafik dwòg, blanchiman lajan, relasyon ak gang elatriye jwenn sanksyon pa yo e li ajoute ata fanmi yo ap pase anba woulo a tou.
Kèlkeswa moun ki nan relasyon ak bandi an Ayiti, menmsi w te ansyen prezidan oubyen ansyen premye minis, menmsi w te gen kat rezidans ameriken nan men w, lalwa p ap epanye w, si n byen dekòtike entèvansyon madam Cherfilus McCormick la. N ap raple gen anpil gwo zotobre an Ayiti ki nan gwo kalkil paske menm fanmi yo pral pran ti tap pa yo tou.
