Panye solidarite, kado nwèl kat pou fè ve elatriye, okenn bwat Leta pa dwe antre nan lojik sa a paske pa gen lajan pou sa. Okenn moun ki responsab pa gen dwa itilize fon ki sòti nan administrasyon piblik la pou fè kado. Se premye minis de facto Ariel Henry ki siyen kominike sa a e voye pou mesye dam k ap koupe rache nan kès Leta yo.
Ariel Henry sanble sispèk pa gen ase mwayen pou fè wololoy jan sa toujou konn ye nan bwat Leta yo, se poutèt sa li adopte yon mezi parèy. Nan kominike sa a, PM nan di ministè ekonomi ak finans ap founi je gade pou mezi sa a ka aplike.
