Moun yo pa rive idantifye asasine 5 moun sou wout Jivena maten samdi 29 oktòb 2022 a, kole kole ak Union School. Depi kèk jou gen yon ekip moun k ap mache kay malfèktè pou rache yo ak manchèt sou pretèks yo ta touye moun mistikman nan zòn Dezèmit. Daprè sa yon vodouyizan rapòte, gen plis pase 20 moun ki mouri deja nan zòn sa akoz gen yon “boutèy lè” ki debouche e manm popilasyon an sanble ap tire revanj sou evantyèl malfèktè sa yo.
Sòti Jivena pou monte nan kè Petyon Vil, anpil zak malonèt rive fèt dènye jou sa yo. Asasina, vòl, kidnaping pou n site sa yo ase alòske se yon zòn rezidansyèl. Lapolis ak lajistis ta dwe mennen bon jan ankèt pou konnen ki men ki kache dèyè masak sa a yo leve jwenn ki fèt maten an sou wout Jivena a.
