Jan opozisyon an te anonse sa, plizyè santèn manifestan te foule beton an jodi dimanch 31 janvye a nan plizyè vil peyi a pou mande Jovenel Moïse respekte atik 134-2 konstitisyon an epi bay talon li 7 fevriye 2021.

Daprè kèk média nan kapital la ki te kouvri tout manifestasyon an, gen pi piti 1 moun ki pran bal nan men lapolis nan mobilizasyon sila.

Jean-Charles Moïse se youn pami lidè nan opozisyon an ki te prezan sou beton an, kote branch manifestasyon li an te sòti nan komin Petyonvil, desann channmas pou al delivre mesaj li bay Jovenel Moïse ak kominote entènasyonal la devan palè nasyonal.

Ansyen Senatè nò a mande Jovenel Moïse pou kite pouvwa a 7 fevriye 2021, epi tou pale ak sektè ki kenbe peyi a an otaj. Lidè Pitit Dessalines nan di se pa sèl Jovenel y ap voye ale, men se sistèm nan yo pral konbat apati 7 fevriye.

Jeff Jean Joseph