Lapolis arete 11 moun nan kad yon operasyon anti-dwòg ki te dewoule nan dat 29 dawout nan zòn Monchil ak Sentelèn, nan komin Jakmèl. Operasyon an te fèt sou direksyon Direksyon Depatmantal Sidès PNH la. Pami moun yo arete yo, otorite yo idantifye Dabady Mimose, Jean Francky, Marie Antoinette Alexandra Laurent ak Chérubin Sony. Daprè enfòmasyon lapolis bay, fouy ki te fèt pandan operasyon an pèmèt otorite yo sezi 2,6 kilogram marigwana, kat bal, 18 095 goud ansanm ak lòt materyèl ki ta ka itil nan kad ankèt la.
11 moun yo rete anba kontwòl sèvis polis jidisyè yo, pandan ankèt la ap kontinye pou detèmine nivo patisipasyon chak moun nan aktivite ilegal yo sispèk yo.
