Li fè 2 zè nan aprèmidi, anpil kout zam ap tire aktyèlman nan tout Pòtoprens. Bandi ak zam ki fè pati federasyon gang “G9 an Fanmi ak Alye” ki gen pou pòt pawòl “Babekyou” ap tire nan tout direksyon.
Repòtè nou ki nan lari a enfòme genyen gwo echanj kout zam k ap fèt ant lapolis ak bandi. Nan zòn Site solèy, Douya, sou Wout ayopò a se pa pale.
« Bandi do touni ki sòti anndan Simon-Pelé ap fè fas kare ak yon cha lapolis ki sou wout ayopò a », daprè sa li konstate.
N ap raple sitiyasyon an pa diferan nan zòn anba lavil ak bisantnè kote nèg ak zam se sèl kòk chante jodi madi 26 Oktòb la.
N ap raple gen yon operasyon “Peyi lòk” pou 3 jou sou teritwa nasyonal la ke divès sektè, pami yo transpò, lanse pou denonse Leta ayisyen ki pa fè anyen kont ensekirite a ak gaz ki pa genyen. Jimmy Cherizier alyas “Babekyou” fè konnen toutotan Premye minis Ariel Henry pa demisyone okenn kamyon gaz pap kite tèminal Varreux pou ale nan ponp yo. Mikanò, k ap dirije Waf Jeremi, mande pa bò kote pa l « 50 milyon goud pou kite kamyon gaz yo pase pou l al founi estasyon esans yo ».
N ap raple yè lapolis la te voye 4 cha blende al sekirize tèminal Varreux ki nan Site Solèy, bandi ak zam fè yo kouri anba kout bal.
