Nan plas diskou, ak gwo bout selebrasyon, se yon gwo lavalas san k ap vide desann melanje ak yon gwo rigòl dlo nan je pèp Ayisyen. Peyi a santi san, grenn bal tounen wòch pou desandan Desalin ak lòt Ewo Vètyè yo mache. 221 lane aprè gwo batay Vètyè ki te bay lame Napoleyon Bonapat la bout tèren, se kriminèl sanginè k ap vide bal nan tèt yon popilasyon ki san sekou anfas yon Leta san koutcha.
Olye pou nèg isit pale de souverènte Ayiti, se menm peyi kolonizatè sa a yo voye sòlda ayisyen al pran fòmasyon ladan l. Ayiti ap toufe anplas!
